Энергетика туралы айтқанда, көпшілік алдымен электр желілерін жөндейтін немесе қосалқы станцияларды күтетін мамандарды елестетеді. Алайда энергетика – бұл тек техникалық жұмыс емес, ол – заңгерлер, бухгалтерлер, диспетчерлер мен инженерлер қызмет ететін тұтас жүйе. Бұл салада еңбек қауіпсіздігін қамтамасыз ететін мамандардың рөлі ерекше, себебі тек қауіпсіздікті қатаң бақылау арқылы ғана үйлерде жарық пен жылуды қамтамасыз етуге болады.

Қауіпсіздікті қамтамасыз ететін мамандардың бірі – Асылхан Ертаева, ол – «МӨЭК» АҚ-ның еңбек қорғау және қауіпсіздік техникасы қызметіндегі жалғыз әйел-инженер. Асылхан Кутдибаевнаның айтуынша, ол бұл мамандықты мектеп кезінен таңдаған. 2004 жылы Түрікменстанның Балқан облысы Жебел ауылындағы №14 орта мектепті аяқтап, жоғары білім алуға нық шешім қабылдаған. ҰБТ-ны сәтті тапсырып, Ақтау қаласындағы Ш. Есенов атындағы Каспий мемлекеттік технологиялар және инжиниринг университетіне грантқа түскен.

«Болашақ мамандығым мені өзі тапты. Инженерия факультетінде маған «Еңбек қорғау және қауіпсіздік техникасы» мамандығының маңыздылығы туралы айтып берді. Сол кезде-ақ бұл бағыттың болашағы зор екенін түсіндім, себебі өндірістегі қауіпсіздік – кез келген компания жұмысының негізі. 2009 жылы инженер дипломын алдым», – дейді Асылхан Ертаева.

Еңбек жолын Асылхан Кутдибаевна «Каспий консалтинг» компаниясында тәуекелдерді бағалаумен бастады. Кейін «Қазақстан темір жолы» АҚ-на ауысып, онда да құнды тәжірибе жинады. 2017 жылы Асылхан Ертаева «МӨЭК» АҚ ұжымына қосылды. Бүгінде ол компанияның энергетикалық нысандарында қауіпсіздік ережелерінің сақталуын бақылауға жауапты. Оның міндетіне жаңа қызметкерлерге нұсқаулықтар өткізу, жазатайым оқиғалардың алдын алуға бағытталған шараларды әзірлеу, сондай-ақ «Еңбек қорғау күндерін» ұйымдастыру кіреді.

Оның басты мақсаты – әрбір қызметкердің күн сайын үйіне аман-есен оралуын қамтамасыз ету.

«Біздің мамандықтағы ең бастысы – адамгершілік пен жауапкершілік. Әріптестер арасында сенім болса, жұмыс та жеңіл әрі тиімді болады. Энергетикада бұл өте маңызды, себебі біздің шешімдеріміз адамдардың өмірі мен қауіпсіздігіне тікелей әсер етеді», – деп атап өтті Асылхан Ертаева.

Жұмыстан тыс уақытта Асылхан Ертаева – қамқор ана және жар. Жолдасы да энергетика саласында еңбек етеді. Олар бірге бес баланы тәрбиелеп отыр. Үйде де, жұмыста да Асылхан жауапкершілік, құрмет және білімге ұмтылу сияқты маңызды құндылықтарды сіңіруге тырысады. Ол жаңа тенденцияларға қызығып, мотивациялық тренингтер мен семинарларға қатысады. Оның пікірінше, үнемі оқу мен дамуға ұмтылу – адамды мықты әрі қоғамға пайдалы етеді.

«Энергетика – бұл құрметті әрі жауапты мамандық. Барлық жаңа технологиялар электр қуатына негізделген. Энергетикада жұмыс істеу – қоғам өміріне үлес қосу деген сөз. Сондықтан әр жас маман білікті болып, тәжірибе жинауға және білімін үнемі жетілдіруге ұмтылуы тиіс», – деді Асылхан Кутдибаевна.

Асылхан Ертаеваның тарихы – энергетиканың тек желілерде жұмыс істейтін адамдарды ғана емес, бүкіл жүйенің қауіпсіздігі мен сенімділігін қамтамасыз ететін мамандарды біріктіретінін көрсетеді. Бұл салада «ер» немесе «әйел» мамандығы деген ұғым жоқ – мұнда кәсібилік, жауапкершілік пен өз ісіңе деген сүйіспеншілік бағаланады.

.